नांदेडहून कळमनुरीत अवैध रेती व्यापार? आखाडा बाळापुर परिसरात रात्री हायवा-टिपरची वर्दळ
कळमनुरी तालुक्यातील आखाडा बाळापुर परिसरात अवैध रेती व्यवसाय वाढत असल्याची माहिती समोर आली आहे. नांदेडहून रात्रीच्या वेळी मोठ्या प्रमाणात रेती वाहून आणली जात असल्याचा नागरिकांचा आरोप आहे. ही वाहतूक प्रामुख्याने हायवा आणि टिपर वाहनांद्वारे केली जात असल्याची माहिती मिळाली असून, अनेक वाहनांवर नंबर प्लेटदेखील दिसत नाहीत.
स्थानिकांच्या म्हणण्यानुसार, रेती उतरवण्याची प्रक्रिया मध्यरात्रीच पार पाडली जाते. वाहन येते, काही मिनिटांत रेती उतरते आणि पुढील वाहनासाठी मार्ग मोकळा होतो. या सर्व प्रक्रियेची माहिती संबंधित महसूल प्रशासनाला असतानाही कोणतीही कारवाई होत नसल्याचा आरोप केला जात आहे.
काही नागरिकांच्या दाव्यानुसार, तलाठी आणि मंडळ अधिकाऱ्यांच्या संगनमतामुळे हा व्यवसाय उघडपणे सुरू राहिल्याची शंका व्यक्त करण्यात आली आहे. ‘वरून आदेश असल्यामुळे कारवाई होत नाही’ अशी चर्चा देखील स्थानिक पातळीवर सुरू आहे. त्यामुळे रेतीमाफियांच्या या कथित वाढत्या दबदब्यामुळे नागरिकांमध्ये भीतीचे वातावरण निर्माण झाले आहे.
रात्री उशिरापर्यंत सुरू राहणारी वाहतूक, रस्त्यांवरील धूळ आणि आवाजामुळे सामान्य नागरिक त्रस्त झाले आहेत. प्रशासनाकडून कोणतीही अधिकृत प्रतिक्रिया अद्याप मिळालेली नाही. या प्रकरणाची चौकशी करून योग्य ती कारवाई करावी, अशी मागणी नागरिकांकडून होत आहे.
