अड्याळ रोडवर ‘मरणाचे आमंत्रण’! वापरलेला वैद्यकीय कचरा रस्त्यावर फेकल्याने नागरिक संतप्त

भंडारा :भंडारा जिल्ह्यातील पवनी तालुक्यातील अड्याळ–चकारा चिचाड रोडवर आरोग्य विभागाचा अत्यंत धोकादायक बेफिकीरपणा समोर आला आहे. या रस्त्याच्या कडेला वापरलेली इंजेक्शन्स, रक्ताळलेली कॉटन, सुई आणि इतर बायो-मेडिकल वेस्ट फेकल्याचा धक्कादायक प्रकार उघडकीस आला आहे.

नागरिकांच्या सुरक्षेला धोका

• हा रस्ता दररोज विद्यार्थी व्यायाम करण्यासाठी वापरतात, महिला सकाळी-संध्याकाळी फिरण्यासाठी येतात आणि चिचाड येथील मुले शाळेत जाण्यासाठी याच मार्गाचा वापर करतात.
• याच मार्गावर ‘मरणाला आमंत्रण देणारा’ हा वैद्यकीय कचरा फेकण्यात आला आहे.
• “अनावधानाने कोणाच्या पायात सुई रुतली, तर जबाबदार कोण?” असा संतप्त सवाल नागरिक विचारत आहेत.

नियमांचे उल्लंघन आणि प्रशासनावर टीका

• आरोग्य विभागाने शासनाचे वैद्यकीय कचरा व्यवस्थापनाचे नियम पूर्णपणे पायदळी तुडवले आहेत.
• वैद्यकीय कचरा कुठे टाकायचा आणि कसा नष्ट करायचा याचे स्पष्ट नियम असूनही, रस्त्यावर कचरा फेकून आरोग्य विभाग केवळ ढोंग करत आहे का, असा प्रश्न नागरिक विचारत आहेत.
• “नागरिक-विद्यार्थ्यांच्या सुरक्षेची तमा न-बाळगता कचरा फेकणे म्हणजे, ‘तुम्ही जगा की मरा, आम्हाला काय?’ असा संदेशच आरोग्य विभाग देत आहे,” अशी तीव्र प्रतिक्रिया नागरिक व्यक्त करत आहेत.

तात्काळ उच्चस्तरीय चौकशीची मागणी

नागरिकांनी या घटनेच्या तात्काळ उच्चस्तरीय चौकशीची आणि जबाबदार व्यक्तींवर कठोर कारवाईची मागणी केली आहे. जर तातडीने कारवाई झाली नाही, तर हा संताप लवकर शांत होणार नाही, असेही नागरिकांचे म्हणणे आहे. या गंभीर प्रकाराकडे स्थानिक प्रशासन मूक का आहे, असा सवाल उपस्थित केला जात आहे.