दर्यापूर नगरपालिका निवडणुकीसाठी काँग्रेसची जाहीर सभा, उमेदवार मंदाकिनी भारसाकळे यांचा प्रचार
दर्यापूर नगरपालिका निवडणुकीच्या पार्श्वभूमीवर भारतीय राष्ट्रीय काँग्रेसच्या नगराध्यक्ष पदाच्या उमेदवार मंदाकिनी भारसाकळे यांच्या प्रचारार्थ मौलाना आझाद मैदानावर जाहीर सभा पार पडली. सभेला काँग्रेसचे राज्यसभा खासदार इमरान प्रतापगडी यांसह अनेक मान्यवर उपस्थित होते.
सभेत मोठ्या प्रमाणात नागरिकांची उपस्थिती होती. प्रतापगडी यांनी आपल्या भाषणात दर्यापूरवासीयांना मागील निवडणुकीतील चुका टाळण्याचे आवाहन केले आणि यावेळी योग्य निर्णय घेण्याचे सांगितले. सभेत खासदार बलवंत वानखडे यांनी मिळणाऱ्या निधीविषयी माहिती दिली. प्रतापगडी यांनी राज्यसभेमार्फत दर्यापूरच्या विकासासाठी मदत करण्याची तयारी व्यक्त केली.
प्रतापगडींच्या भाषणातील शेरोशायरी व गझल यांना उपस्थितांनी मोठ्या उत्साहात दाद दिली. सभेत काँग्रेसचे जिल्हाध्यक्ष बबलू देशमुख, माजी पालकमंत्री यशोमती ठाकूर, खासदार बलवंत वानखडे, सुधाकरराव भारसाकडे आणि इतर पदाधिकारी उपस्थित होते.
दर्यापूरमधील काही नागरिकांनी सांगितले की या निवडणुकीत विविध समाजघटकांचा कल काँग्रेसकडे असल्याचे दिसत आहे. 2016 च्या निवडणुकीचा उल्लेख करत काहींनी यावेळी एकजूट राहण्याचा प्रयत्न केला जाईल असे मत व्यक्त केले.
सभेच्या शेवटी इमरान प्रतापगडी यांनी नगराध्यक्ष पदासाठी उमेदवार मंदाकिनी भारसाकळे यांच्या विजयाबाबत विश्वास व्यक्त केला आणि विजय मिळाल्यानंतर पुन्हा दर्यापूरला भेट देण्याचे आश्वासन दिले.
