अमेरिकेत सैन्यदलाच्या जवानाच्या हत्येनंतर स्थलांतरितांवर कारवाई; आश्रयप्रक्रिया स्थगित
या आठवड्यात वॉशिंग्टनमध्ये नॅशनल गार्डच्या जवानांवर झालेल्या प्राणघातक हल्ल्यानंतर अमेरिकन सरकारने सर्व आश्रय-निर्णय तात्पुरते थांबवले असून, अधिकाऱ्यांनी शुक्रवारी ही माहिती दिली. अध्यक्ष डोनाल्ड ट्रम्प यांनी स्थलांतर धोरण आणखी कडक करण्याच्या दिशेने घेतलेले हे ताजे पाऊल आहे.
यूएस सिटिझनशिप अँड इमिग्रेशन सर्व्हिसेस (USCIS) चे संचालक जोसेफ एडलो यांनी सांगितले की, “प्रत्येक परदेशी व्यक्तीची अत्यंत काटेकोर चौकशी व छाननी होईपर्यंत आम्ही सर्व आश्रय-निर्णय स्थगित केले आहेत.”
ही घोषणा 26 नोव्हेंबर रोजी झालेल्या हल्ल्यानंतर करण्यात आली. एका अफगाण नागरिकाने दोन नॅशनल गार्ड सैनिकांवर गोळीबार केल्याचा आरोप आहे. जखमींपैकी एका महिला सैनिकाचा उपचारादरम्यान मृत्यू झाला, ज्यामुळे देशभरात तीव्र प्रतिक्रिया उमटल्या आणि परदेशी नागरिकांवरील देखरेख अधिक कडक करण्याची मागणी वाढली.
या घटनेनंतर प्रशासनाने स्थलांतर नियंत्रण अधिक मजबूत करण्याची तयारी दाखवली आहे. अध्यक्ष ट्रम्प यांनी “थर्ड वर्ल्ड” देशांतून होणारे स्थलांतर तात्पुरते स्थगित करण्याची घोषणाही केली.
आश्रय प्रक्रियावरील बंदी किती काळ टिकणार याबाबत अधिकाऱ्यांनी अद्याप स्पष्ट केलेले नाही; मात्र या निर्णयामुळे आश्रयप्रक्रियेची प्रतीक्षा करणाऱ्या हजारो अर्जदारांवर तात्काळ परिणाम होण्याची शक्यता आहे.
