नगरपालिकांच्या निवडणुकीसाठी जिल्हाधिकारी आशिष येरेकर यांची चांदूरबाजार भेट
अमरावती, २६ नोव्हेंबर २०२५ – येत्या दोन डिसेंबर रोजी होणाऱ्या नगरपालिका आणि नगरपंचायतींच्या निवडणुकीच्या पार्श्वभूमीवर जिल्हाधिकारी श्री. आशिष येरेकर यांनी चांदूरबाजार येथे भेट देऊन मतदानाची तयारी पाहणी केली. या दौऱ्यात त्यांनी नगरपालिकेच्या शाळांनाही भेट दिली.
जिल्हाधिकारी श्री. येरेकर यांनी नगर परिषद चांदूरबाजार येथील स्ट्राँग रूमची पाहणी केली आणि मतदान केंद्राध्यक्ष व मतदान अधिकाऱ्यांसाठी साहित्य वाटपाचे ठिकाण तपासले. यावेळी निवडणूक निर्णय अधिकारी तथा तहसिलदार सोनल सूर्यवंशी, सहाय्यक निवडणूक निर्णय अधिकारी व मुख्याधिकारी गीता ठाकरे, सहाय्यक निवडणूक निर्णय अधिकारी व नायब तहसीलदार मनोज सोनारकर, तसेच श्री. गवई, यश अग्रवाल व श्री. थोरात यांसह अनेक पदाधिकारी उपस्थित होते.
श्री. येरेकर यांनी नगर परिषद विद्यालय व कनिष्ठ विज्ञान महाविद्यालयाला भेट देऊन खोली क्र. १ मधील मतदान केंद्राची पाहणी केली. या वेळी सहावीतील विद्यार्थ्यांशी संवाद साधला आणि शाळेत सुरू असलेल्या विज्ञान प्रदर्शनाला भेट देऊन शाळेचे मुख्याध्यापक, शिक्षक व विद्यार्थी यांच्यासह कार्यक्रमाचे निरीक्षण केले.
याद्वारे जिल्हाधिकारी यांनी निवडणूक प्रक्रियेची तयारी योग्य प्रकारे होत असल्याची खात्री घेतली.
