अमरावती : प्रारूप मतदार यादीत मोठ्या प्रमाणात हेराफेरीचा आरोप; काँग्रेसकडून तात्काळ पुनरावलोकनाची मागणी

अमरावती महानगरपालिकेने ऑनलाइन जाहीर केलेल्या प्रारूप मतदार यादीनंतर शहरात मोठी चर्चा सुरु झाली आहे. या संदर्भात आज अमरावती काँग्रेस पक्षाच्या वतीने आयोजित पत्रकार परिषदेत प्रारूप मतदार यादीत मोठ्या प्रमाणात हेराफेरी झाल्याचा गंभीर आरोप करण्यात आला. यावेळी सत्ताधारी भाजप महायुतीकडून “मतांची चोरी” केल्याचा आरोपही काँग्रेसने लावला.

काँग्रेसने सांगितले की महानगरपालिकेने जाहीर केलेल्या प्रारूप मतदार याद्यांमध्ये अनेक प्रभागांमध्ये गोंधळ, अनियमितता आणि फेरफार आढळत आहेत. काही प्रभागांतील मतदारांना दुसऱ्या प्रभागात हलविण्यात आले असून, अनेक अनोळखी व्यक्तींची नावे प्रभागाच्या मतदार यादीत समाविष्ट झाल्याचे निदर्शनास आणण्यात आले.

काँग्रेसची मुख्य मागणी अशी—

• संपूर्ण २२ प्रभागांच्या मतदार याद्यांचे स्वातंत्र्य तपासणीसह तात्काळ पुनरावलोकन करावे.
• मूळ प्रभागातील रहिवाशांची विनाकारण हलविलेली नावे परत समाविष्ट करावीत.
• प्रभागाच्या हद्दीबाहेरील आणि अनोळखी मतदारांची नावे याद्यांमधून तात्काळ वगळावीत.
• पात्र असूनही ज्या रहिवाशांची नावे यादीतून गाळण्यात आली आहेत, त्यांची नावे समाविष्ट करावीत.

काँग्रेसच्या म्हणण्यानुसार, जर या मागण्या पूर्ण झाल्या नाहीत तर पक्षाच्या वतीने व्यापक आणि तीव्र आंदोलन छेडण्यात येईल. ही माहिती आज झालेल्या पत्रकार परिषदेत देण्यात आली.