माहूर तालुक्यात दुहेरी हत्याकांडाचा पर्दाफाश; दोन महिलांची हत्या करून दागिने लुटणारे आरोपी १२ तासांत अटक

माहूर तालुक्यातील पाचुंदा शिवारात कापूस वेचणीला गेलेल्या दोन महिलांची गळा दाबून हत्या करून सोन्याचे व चांदीचे दागिने लुटणाऱ्या आरोपींना पोलिसांनी केवळ १२ तासांत जेरबंद केले. स्थानिक गुन्हे शाखेच्या वेगवान आणि अचूक कारवाईमुळे या गंभीर गुन्ह्याचा थरारक उलगडा झाला. विशेष म्हणजे आरोपी अदिलाबाद, यवतमाळ आणि किनवटपर्यंत पळून जाण्याच्या तयारीत होते, मात्र पोलिसांच्या शोध मोहीमेने त्यांची सुटका रोखली.

घटना कशी घडली?
२० नोव्हेंबर रोजी पाचुंदा शिवारात कापूस वेचणीस गेलेल्या दोन महिला –

• अंतकलाबाई अशोक अडागळे (55)
• अनुसयाबाई साहेबराव अडागळे (50)

यांची अज्ञातांनी गळा दाबून हत्या केली. नंतर त्यांच्या अंगावरील दागिने काढून आरोपी घटनास्थळावरून फरार झाले. माहिती मिळताच वरिष्ठ अधिकारी तातडीने घटनास्थळी दाखल झाले.

पोलीसांची वेगवान मोहीम
पोलीस अधीक्षक अबिनाश कुमार यांनी गुन्ह्याची गंभीरता ओळखून तत्काळ स्थानिक गुन्हे शाखेच्या चार स्वतंत्र पथकांना अदिलाबाद, यवतमाळ, माहूर आणि किनवट परिसरात आरोपींच्या शोधासाठी रवाना केले. संशयितांचे स्केच पुण्यातील तज्ञांच्या मदतीने व्हिडिओ कॉलवरून तयार करण्यात आले आणि तपासाला वेग आला.

मुख्य आरोपीचा माग कसा लागला?
21 नोव्हेंबर रोजी सहाय्यक पोलीस निरीक्षक रवि वाहुळे यांना गुप्त माहिती मिळाली की मुख्य आरोपी दत्ता सुरेश लिंगलवार (38), रा. सावळी (ता. आर्णी, यवतमाळ) हा करंजी परिसरातील नातेवाईकांच्या शेतात लपला आहे. पथकाने सापळा रचून त्याला ताब्यात घेतले. चौकशीत त्याने गुन्ह्याची कबुली दिली आणि साथीदाराचे नाव उघड केले –

• गजानन गंगाराम येरजवार (41), रा. गंगाजीनगर

पोलिसांनी तत्काळ गजाननलाही घरातून अटक केली.

जप्ती
दोघांकडून –

• गुन्ह्यात वापरलेली मोटारसायकल
• दोन मोबाईल फोन

जप्त करण्यात आले.

संयुक्त कारवाईचा मोठा यश
या महत्त्वपूर्ण तपासात स्थानिक गुन्हे शाखा नांदेडचे पोलीस निरीक्षक उदय खंडेराय आणि त्यांच्या पथकाने निर्णायक भूमिका बजावली. यवतमाळ पोलिसांनीही तपासात मोलाचे सहकार्य केले.

फक्त १२ तासांत दुहेरी हत्याकांड उकलून आरोपींना पकडण्यात पोलिसांनी दाखवलेल्या तत्परतेचे सर्वत्र कौतुक होत आहे.