इतवारीत भगवती मेडिकल स्टोअरवर पोलिसांचा छापा; अवैध औषधांचा मोठा साठा जप्त, दोन केमिस्ट ताब्यात
नागपूरच्या इतवारी परिसरातील भगवती मेडिकल स्टोअरवर पोलिसांनी मोठी कारवाई करत नशेसाठी वापरल्या जाणाऱ्या अवैध औषधांचा मोठा साठा जप्त केला. पोलीस उपायुक्त राहुल मदने यांनी 20 नोव्हेंबर रोजी सायंकाळी दिलेल्या माहितीमध्ये या कारवाईची पुष्टी केली.
मिळालेल्या गुप्त माहितीनंतर पोलिसांनी तत्काळ पथक तयार केले आणि दुकानातील अनियमिततेची खात्री करण्यासाठी डमी ग्राहक पाठवण्यात आला. औषध विक्रीची पुष्टी झाल्यानंतर पोलिसांनी मेडिकल स्टोअरवर छापा टाकला.
कारवाईदरम्यान दुकानातून मोठ्या प्रमाणात अवैध औषधे आणि नशेच्या उपयोगात येऊ शकणारा साठा जप्त करण्यात आला. याप्रकरणी मेडिकल स्टोअरमधील दोन केमिस्टना पोलिसांनी ताब्यात घेतले असून प्रकरणाचा सखोल तपास सुरू आहे.
ही औषधे किरकोळ विक्रीपुरती होती की मोठ्या रॅकेटशी संबंधित होती, याची चौकशी पोलिसांकडून केली जात आहे. या प्रकारानंतर परिसरातील मेडिकल व्यवसायावरही प्रश्नचिन्ह निर्माण झाले आहे.
