मंगळवारी पुसद उपजिल्हा रुग्णालय परिसरात एक जखमी कोल्हा आढळल्याने नागरिकांमध्ये भीतीचे वातावरण निर्माण झाले.
नागरिकांनी तत्काळ वन विभागाला याबाबत कळवले. वन विभागाचे पथक घटनास्थळी पोहोचताच त्यांनी कोल्ह्याला सुरक्षितपणे जाळ्यात पकडले.
स्थानिकांच्या माहितीनुसार, गेल्या काही दिवसांपासून हा कोल्हा परिसरात भटकताना दिसत होता. उपाशी राहिल्यामुळे त्याची प्रकृती खालावली होती आणि तो थकलेल्या अवस्थेत एका ठिकाणी बसलेला होता. वन विभागाच्या कर्मचाऱ्यांनी कोल्ह्याला उपचारासाठी पशुवैद्यकीय दवाखान्यात नेले असून, सध्या त्याची काळजीपूर्वक देखभाल सुरू आहे. प्रकृतीत सुधारणा झाल्यानंतर त्याला जंगलात सोडण्यात येणार असल्याची माहिती मिळाली आहे.
या घटनेमुळे परिसरातील नागरिकांनी वन विभागाचे कौतुक केले आहे.
