मुंबई विमानतळावर दुर्दैवी अपघात — ३० वर्षीय टेक्निकल सुपरवायझरचा २५ फूट उंचीवरून पडून मृत्यू
मुंबई, दि. १ नोव्हेंबर — मुंबई आंतरराष्ट्रीय विमानतळावर एक दुर्दैवी अपघात घडला असून, कन्व्हेयर बेल्ट तपासणीदरम्यान ३० वर्षीय टेक्निकल सुपरवायझरचा मृत्यू झाला आहे. ही दुर्घटना ३० ऑक्टोबर रोजी सायंकाळी साडेचार वाजण्याच्या सुमारास घडली.
मृत कर्मचाऱ्याचे नाव दुर्गेश पांडे (वय ३०) असे असून, तो अंधेरी (पूर्व) परिसरात राहत होता. दुर्गेश पांडे हे त्यांच्या मामा सुजितकुमार ओझा यांच्या मालकीच्या प्रभात असोसिएट्स या कंपनीत टेक्निकल सुपरवायझर म्हणून कार्यरत होते. विमानतळावर बेल्ट मार्ग तपासणीचे काम सुरू असताना हा अपघात घडला.
मिळालेल्या माहितीनुसार, दुर्गेश पांडे आणि त्यांचा सहकारी दिलीपकुमार सरन हे लेव्हल २ वरील फॉल्स सीलिंगवर जाऊन कन्व्हेयर बेल्ट तपासत होते. तपासणीदरम्यान दुर्गेश यांचा तोल गेला आणि ते सुमारे २५ फूट उंचीवरून खाली पडले. या अपघातात त्यांच्या डोक्याला गंभीर दुखापत झाली.
अपघातानंतर दुर्गेश यांना तात्काळ विले पार्ले (पश्चिम) येथील नानावटी रुग्णालयात दाखल करण्यात आले. मात्र, उपचारादरम्यान त्यांचा मृत्यू झाला. डॉक्टरांनी प्रयत्न केले, तरी जखमा गंभीर असल्याने त्यांना वाचवता आले नाही. या घटनेची नोंद सहारा पोलिस ठाण्यात अपघाती मृत्यू म्हणून करण्यात आली असून, पोलिसांकडून पुढील तपास सुरू आहे. या घटनेने विमानतळावरील कर्मचारीवर्गात हळहळ व्यक्त केली जात आहे.
