दारू प्यायला पैसे न दिल्याने शेजाऱ्याचा खून; कुऱ्हाडीने डोक्यावर वार करून निर्घृण हत्या
सोलापूर – शहरातील गरिबी हटाव झोपडपट्टी क्रमांक १ येथे शुक्रवारी (दि. १७ ऑक्टोबर) रात्री सुमारास दारू प्यायला पैसे न दिल्याच्या कारणावरून एका तरुणाचा निर्घृण खून करण्यात आला. या धक्कादायक प्रकारामुळे परिसरात खळबळ उडाली आहे. याप्रकरणी मयताच्या पत्नीने विजापूर नाका पोलीस ठाण्यात फिर्याद दिली असून, पोलिसांनी दोघांविरुद्ध खुनाचा गुन्हा नोंदवला आहे.
मृत तरुणाचे नाव यतिराज दयानंद शंके (वय ३६) असे आहे. तो झोपडपट्टीत आपल्या कुटुंबासोबत राहत होता. शुक्रवार रात्री सुमारे ११ वाजण्याच्या सुमारास आरोपी आकाश तुळजाराम बलरामवाले आणि नवल खरे (दोघेही रा. गरिबी हटाव झोपडपट्टी नं. १) यांनी यतिराजकडे दारू प्यायला पैसे मागितले. मात्र यतिराजने पैसे देण्यास नकार दिल्यामुळे त्यांच्यात वाद झाला.
वादाच्या रागातून आरोपींनी यतिराजला आधी लाथाबुक्क्यांनी बेदम मारहाण केली. त्यानंतर आकाश बलरामवाले घरातून कुऱ्हाड घेऊन आला आणि यतिराजच्या डोक्यावर जोरदार वार केला. या हल्ल्यात यतिराज गंभीर जखमी झाला. घटनेनंतर, मयताची पत्नी प्रतिभा शंके आणि मित्र वीरेश रामपुरे यांनी त्याला तत्काळ उपचारासाठी शासकीय रुग्णालयात दाखल केले. मात्र, उपचारादरम्यान शनिवारी पहाटे त्याचा मृत्यू झाला.
या घटनेमुळे परिसरात भीतीचे आणि संतापाचे वातावरण पसरले आहे. पोलिसांनी दोघा आरोपींविरुद्ध कलम ३०२ (खून) अंतर्गत गुन्हा नोंदवला असून, अधिक तपास सुरू आहे. झोपडपट्टीत आधीपासूनच वाद सुरू होते, अशी माहिती स्थानिकांनी दिली आहे. केवळ दारूसाठी पैसे न दिल्याने एका व्यक्तीचा जीव गमवावा लागणे ही समाजासाठी अत्यंत दुःखद आणि चिंतेची बाब आहे.
