सी. पी. राधाकृष्णन यांचा आज देशाचे १५वे उपराष्ट्रपती म्हणून शपथविधी पार पडला. नवी दिल्लीमधील राष्ट्रपती भवनातील गणतंत्र मंडपात झालेल्या या समारंभात राष्ट्रपती द्रौपदी मुर्मू यांनी त्यांना पदाची शपथ दिली.
या शपथविधीला पंतप्रधान नरेंद्र मोदी, माजी राष्ट्रपती रामनाथ कोविंद, माजी उपराष्ट्रपती जगदीप धनखड, हमीद अन्सारी, एम. वेंकय्या नायडू यांसह अनेक माजी आणि सध्याचे केंद्रीय मंत्री उपस्थित होते. तसेच महाराष्ट्राचे मुख्यमंत्री देवेंद्र फडणवीस, उपमुख्यमंत्री एकनाथ शिंदे, महाराष्ट्र विधानसभेचे अध्यक्ष ॲड. राहुल नार्वेकर, विधानपरिषद सभापती प्रा. राम शिंदे, विविध राज्यांचे मुख्यमंत्री, राजकीय नेते, उच्चपदस्थ अधिकारी आणि समाजातील मान्यवरही उपस्थित होते.
उपराष्ट्रपतीपदासाठी झालेल्या निवडणुकीत सी. पी. राधाकृष्णन यांनी इंडिया आघाडीच्या उमेदवार बी. सुदर्शन रेड्डी यांचा १५२ मतांनी पराभव केला. या निवडणुकीनंतर त्यांनी आज राज्यसभेच्या अध्यक्षपदाचा कार्यभारही स्वीकारला. सी. पी. राधाकृष्णन यांची उपराष्ट्रपतीपदी निवड झाल्यामुळे त्यांनी महाराष्ट्राच्या राज्यपालपदाचा राजीनामा दिला. आता महाराष्ट्राच्या राज्यपालपदाचा अतिरिक्त कार्यभार गुजरातचे राज्यपाल आचार्य देवव्रत यांच्याकडे सोपवण्यात आला आहे.
उपरोक्त सर्व सोहळ्यात सर्वोच्च न्यायालयाचे मुख्य न्यायमूर्ती भूषण गवई, लोकसभा अध्यक्ष ओम बिर्ला, केंद्रीय मंत्री अमित शहा, नितीन गडकरी, राजनाथ सिंग, जे. पी. नड्डा, पीयूष गोयल, तसेच विविध राजकीय आणि सामाजिक क्षेत्रातील मान्यवर उपस्थित होते. सी. पी. राधाकृष्णन हे राज्यसभेचे पदसिद्ध अध्यक्ष असून उपराष्ट्रपती म्हणून त्यांना अनेक प्रशासकीय व विधायी जबाबदाऱ्या सोपवण्यात आल्या आहेत. आजच्या शपथविधीमुळे भारतीय लोकशाहीतील एक महत्त्वाचा टप्पा पुन्हा एकदा गाठला आहे, ज्यामध्ये संसद आणि कार्यपालिका यांच्यातील समन्वयाचे महत्त्व अधोरेखित झाले आहे.
