नागपूर : नागपूरहून निघालेला 19 लाखांचा माल… एका मोठ्या व्यापारी कंपनीने 30 किलोच्या 1000 बॅग तूर डाळीचा माल उत्तर प्रदेशमध्ये पोहोचवण्यासाठी एका ट्रान्सपोर्टरला दिला. गाडी नंबर होता एम.एच. 28 बी.बी. 7253 आणि चालक होता ज्ञानेश्वर अवचार. त्याच्यासोबत साहील खान आणि दलाल लालबहादुर असे दोघे होते. 23 ऑगस्ट 2025 रोजी सकाळी 11 वाजता हा माल घेऊन गाडी निघाली. पण, नियोजित ठिकाणी पोहोचण्याऐवजी ती गाडी इंदोरमध्ये सापडली.
विश्वासघात झाला… ज्या तीन लोकांवर माल पोहोचवण्याची जबाबदारी होती, ते इंदोरमधून पळून गेले होते. गाडीची पाहणी केली असता, 1000 पैकी फक्त 550 बॅग गाडीत होत्या. उर्वरित बॅगची चौकशी केली असता, त्या 40 किलोमीटर दूर एका गोदामात उतरवल्याचे समजले. त्यानंतर पोलिसांच्या मदतीने आणि प्रयत्नांनी त्यातील काही माल परत मिळवण्यात आला. पण, तोपर्यंत मोठा विश्वासघात झाला होता.
लाखो रुपयांचे नुकसान… तपासणी केली असता, एकूण 106 बॅग तूर डाळ गायब झाल्या होत्या, ज्याची किंमत 2 लाख 6 हजार रुपये होती. धक्कादायक बाब म्हणजे, 115 बॅग तूर डाळ पाण्यामुळे खराब झाली होती, ज्यामुळे 2 लाख 24 हजार रुपयांचे नुकसान झाले. अशाप्रकारे, एकूण 4 लाख 30 हजार रुपयांहून अधिक रकमेची फसवणूक झाली. आता पोलिसांनी या तीन आरोपींविरोधात गुन्हा दाखल केला असून, पुढील कारवाई सुरू आहे.
