अमरावतीत तोतया पोलिसांचे धाडस, महिलांना लुटले
अमरावती : ही घटना मंगळवारी गाडगे नगर आणि राजापेठ पोलीस स्टेशनच्या हद्दीत घडली. दिवसाढवळ्या घडलेल्या या घटनेने शहरात खळबळ माजली आहे. स्वतःला पोलीस असल्याचे भासवून तीन आरोपींनी दोन महिलांना लुटले. या घटनेला आता 36 तास उलटून गेले आहेत, पण आरोपींना पकडण्यात पोलिसांना अद्याप यश आलेले नाही. विशेष म्हणजे, आरोपींचे चेहरे सीसीटीव्ही कॅमेऱ्यात स्पष्ट दिसत आहेत, तरीही त्यांना पकडण्यात अमरावती गुन्हे शाखेला अपयश येत आहे. यामुळे, हे आरोपी अमरावती पोलिसांना आणि गुन्हे शाखेला थेट आव्हान देत आहेत, असे चित्र निर्माण झाले आहे.
शहरात चोरी आणि इतर गुन्हे शोधण्यात पोलीस आयुक्तालयातील कोणत्याही पोलीस स्टेशनची प्रगती दिसत नाही. ही एक गंभीर बाब आहे. यापूर्वी पोलीस आयुक्त अरविंद चावरिया यांनी सर्व पोलीस स्टेशनमधील डीबी स्कॉट (DB Squad) आणि गुन्हे शाखा युनिट एक (Crime Branch Unit 1) बंद केले आहेत. आता अवैध धंदे आणि गुन्ह्यांवर नियंत्रण ठेवण्याचे काम फक्त गुन्हे शाखेची एक टीम करत आहे, पण वाढत्या गुन्हेगारीमुळे ती सुद्धा अपुरी पडत आहे. नुकतेच, हमालपुरा येथे गणेश विसर्जनाच्या दिवशी एका तरुणाला चाकूने भोसकून तीन आरोपी पसार झाले. या वाढत्या गुन्हेगारीला आळा घालण्यासाठी पोलीस आयुक्त आता कोणती पाऊले उचलतात, याकडे सर्वांचे लक्ष लागले आहे.
