मराठा आरक्षणावरून मनोज जरांगे पुन्हा रणभूमीवर, दसऱ्याला सरकारला अल्टिमेटम
मराठा समाजासाठी आरक्षणाची अंमलबजावणी तात्काळ करावी, अन्यथा न्यायालयात जाण्याचा इशारा मराठा आरक्षणाचे नेते मनोज जरांगे पाटील यांनी सरकारला दिला आहे. नारायणगड येथे होणाऱ्या दसरा मेळाव्यात या संदर्भात महत्त्वाची भूमिका जाहीर केली जाईल, असे त्यांनी पत्रकार परिषदेत स्पष्ट केले.
जरांगे म्हणाले, “हैदराबाद गॅझेटियरप्रमाणे प्रमाणपत्र देण्याची प्रक्रिया लवकर सुरू करावी. यासाठी आवश्यक मनुष्यबळ उपलब्ध करून द्यावे. अन्यथा दसरा मेळाव्यात पुढील दिशा आम्हाला ठरवावी लागेल.”
सरकारने यापूर्वी काढलेल्या शासन आदेशात काही त्रुटी असतील तर त्या सुधाराव्यात, अशी अपेक्षाही त्यांनी व्यक्त केली. “१७ सप्टेंबरपर्यंत प्रमाणपत्र प्रक्रिया सुरू झाली नाही, तर दसरा मेळाव्यात निर्णायक निर्णय घेण्याची वेळ येईल,” असा इशारा त्यांनी दिला.
यावेळी जरांगे यांनी काही ओबीसी नेत्यांच्या टीकेला उत्तर दिले. ते म्हणाले, “मराठा समाजाने हुशारीने आणि शांतपणे आपली भूमिका मजबूत ठेवावी. कोणत्याही टीकेला बळी पडू नका. आम्ही कुणावर हल्ला केलेला नाही, उलट आमच्यावरच हल्ले झाले आहेत. सरकारने नाहक दाखल झालेले गुन्हे मागे घ्यावेत.”
सरकारसोबत संवाद सुरू ठेवत, परंतु ठाम भूमिकेतून समाजाच्या न्याय्य मागण्या पूर्ण करण्यासाठी आम्ही प्रयत्नशील राहू, असे आश्वासनही जरांगे यांनी दिले.
