अमरावतीमध्ये थरारक गोळीबार: दोन आरोपी जेरबंद, एक अल्पवयीन ताब्यात
अमरावती : अमरावती शहरातील फ्रेजरपुरा परिसरात काल (बुधवार, २८ ऑगस्ट) एक धक्कादायक गोळीबाराची घटना घडली. एका जुन्या वादातून तीन आरोपींनी एका तरुणावर आणि त्याच्या वडिलांवर गोळीबार करून प्राणघातक हल्ला केला. या प्रकरणी पोलिसांनी तात्काळ कारवाई करत दोन आरोपींना अटक केली असून, एका अल्पवयीन मुलालाही ताब्यात घेतले आहे.
या संदर्भात अधिक माहिती अशी की, फ्रेजरपुरा परिसरातील अयान शेख हा तरुण आपल्या वडिलांसोबत दुकानासमोर उभा असताना, सय्यद अबूजर ऊर्फ मस्तान, मोहम्मद रेहान आणि एक अल्पवयीन मुलगा मोटारसायकलवरून आले. जुन्या भांडणाच्या कारणावरून त्यांनी अयान आणि त्यांच्या वडिलांना शिवीगाळ करण्यास सुरुवात केली. वादावादी वाढल्यावर आरोपी सय्यद अबूजरने कमरेतून बंदूक काढून गोळीबार केला, तर मोहम्मद रेहानने तलवारीने हल्ला करण्याचा प्रयत्न केला.
या प्राणघातक हल्ल्यात अयान शेख आणि त्याचे वडील थोडक्यात बचावले. घटनेची माहिती मिळताच फ्रेजरपुरा पोलिसांनी तात्काळ गुन्हा दाखल केला. गुन्ह्याचे गांभीर्य लक्षात घेत, अमरावती शहर गुन्हे शाखेचे पोलीस निरीक्षक संदीप चव्हाण यांनी तपास सुरू करण्याचे आदेश दिले.
पोलिसांनी गुप्त माहितीच्या आधारे आरोपींचा शोध घेतला. हे तिघेही थरमकाटा परिसरात लपून बसल्याची माहिती पोलिसांना मिळाली. त्यानुसार, गुन्हे शाखेच्या पथकाने तत्काळ कारवाई करत सय्यद अबूजर, मोहम्मद रेहान आणि त्या अल्पवयीन मुलाला मोठ्या शिताफीने ताब्यात घेतले. चौकशीदरम्यान, आरोपींनी आपला गुन्हा कबूल केला.
विशेष म्हणजे, अटक करण्यात आलेल्या तिन्ही आरोपींवर यापूर्वीही खून आणि खुनाच्या प्रयत्नासारखे गंभीर गुन्हे दाखल आहेत. या कारवाईमुळे अमरावती शहरात पुन्हा एकदा पोलिसांचा आणि कायद्याचा धाक निर्माण झाला आहे. पुढील तपासासाठी आरोपींना फ्रेजरपुरा पोलिसांच्या ताब्यात देण्यात आले आहे.
