‘लालबागचा राजा’ला पहिल्याच दिवशी भाविकांकडून सोनं, चांदी, डॉलर्ससह भरघोस दान!
मुंबई : मुंबईतील सर्वात मोठ्या आणि भव्य गणेशोत्सवांपैकी एक असलेला ‘लालबागचा राजा’ यंदाही भाविकांची आस्था आणि श्रद्धेचा केंद्रबिंदू ठरतोय. बुधवार, 27 ऑगस्ट 2025 रोजी पहाटे 5:00 वाजता मंडळाचे अध्यक्ष बाळासाहेब सुदाम कांबळे यांच्या हस्ते गणरायाची प्राणप्रतिष्ठा पार पडली. दर्शनासाठी पहाटेपासूनच भाविकांची मोठी गर्दी पाहायला मिळाली, आणि याच गर्दीने ‘लालबागच्या राजा’च्या दानपेटीतही भरघोस भर घातली.
पहिल्याच दिवशी आलेलं दान थक्क करणारे
राजाच्या चरणी भाविकांनी सोनं, चांदी, परदेशी चलन, आणि रोख रक्कम स्वरूपात मनःपूर्वक दान केलं. या दानाची मोजणी सध्या बँक ऑफ महाराष्ट्र आणि जीएस महानगर बँकेच्या कर्मचाऱ्यांच्या मदतीने सुरू आहे. ही मोजणी मंडळाचे खजिनदार मंगेश दळवी आणि त्यांच्या कार्यकारिणी सदस्यांच्या उपस्थितीत पार पडते.
कोणकोणत्या वस्तूंचं दान?
सोन्याचं दान :
सोन्याचा मोदक – एका भाविकाने दोन लाख रुपये किमतीचा मोदक दान केला
सोन्याची पावपलं
सोन्याचे हार आणि मुकुटं
सोन्याच्या अंगठ्या आणि नाणी
सोन्याच्या गणपतीच्या मूर्ती
चांदीचं दान :
चांदीची वीट – सुमारे १ किलो वजनाची
चांदीचे मोदक, मुकुट, हार
चांदीचे पाळणे, समया आणि फुलघरं
चांदीचे गणपती
विदेशी चलनातही दान
भारतीय चलनाबरोबरच परदेशी चलन, विशेषतः अमेरिकन डॉलर्स मोठ्या प्रमाणात दानपेटीत सापडले आहेत. परदेशात राहणारे NRI भाविक किंवा देशी-विदेशी पर्यटक राजाच्या दर्शनास येऊन श्रद्धेने दान करत आहेत.
लालबागचा राजा 2025 ची सुरुवात
27 ऑगस्ट 2025 रोजी पहाटे 5 वाजता, ‘लालबागचा राजा सार्वजनिक गणेशोत्सव मंडळा’च्या वतीने गणेशाची प्राणप्रतिष्ठा झाली. त्यानंतर दर्शनासाठी रांग सुरू करण्यात आली आणि काही तासांतच हजारो भाविकांनी दर्शन घेतले.
दान कुठे वापरलं जातं?
‘लालबागचा राजा सार्वजनिक गणेशोत्सव मंडळ’ दरवर्षी गोळा झालेल्या दानाचा उपयोग आरोग्य, शिक्षण, गरजूंसाठी मदत, आपत्ती व्यवस्थापन यांसारख्या समाजोपयोगी आणि कल्याणकारी उपक्रमांमध्ये करते.
लालबागचा राजा LIVE
दर्शनासाठी प्रत्यक्ष येणाऱ्या भाविकांची गर्दी जशी वाढते आहे, तशीच सोशल मीडियावरही ‘लालबागचा राजा’ ट्रेंडमध्ये आहे. मंडळाने दर्शनाची LIVE व्यवस्था सुद्धा उपलब्ध करून दिली आहे.
