PF मधून पैसे काढणे झाले सोपे, आता कागदपत्रांची नाही गरज, अशी आहे प्रक्रिया

कर्मचारी भविष्य निर्वाह निधी संघटनेने (EPFO) त्यांच्या खातेधारकांसाठी एक मोठी दिलासादायक बातमी दिली आहे. तुम्ही तुमच्या EPF खात्यातून पैसे काढण्याचा विचार करत असाल तर ही बातमी तुमच्यासाठी आहे.

मुंबई : तुमच्या भविष्य निर्वाह निधी (PF) खात्यातून पैसे काढायचे असतील, तर आता तुम्हाला कोणत्याही कागदपत्रांची आवश्यकता राहणार नाही. सरकारने ही प्रक्रिया खूप सोपी केली आहे. कामगार आणि रोजगार मंत्रालयाने संसदेत माहिती दिली आहे की तुमचे PF Account आधारशी जोडलेले असेल, तर पॅन क्रमांक आणि बँक तपशील देखील योग्यरित्या अपडेट केले असतील आणि सर्व माहिती ईपीएफओ रेकॉर्डशी जुळली तर काही क्लिकमध्ये पैसे तुमच्या खात्यात ट्रान्सफर केले जातील.

EPFO ने २०१७ मध्ये कंपोझिट क्लेम फॉर्म सुरू केला. याद्वारे तुम्ही लग्न, वैद्यकीय आणीबाणी, मुलांचे शिक्षण, घर खरेदी अशा अनेक महत्त्वाच्या कामांसाठी पीएफमधून आगाऊ पैसे काढू शकता. तुम्ही कोणत्याही वैद्यकीय प्रमाणपत्राशिवाय किंवा इतर कागदपत्रांशिवाय हे पैसे काढू शकता. म्हणजे आता तुम्हाला कोणतेही कागदपत्रे काढण्याची आवश्यकता नाही.

ईपीएफओने असेही सांगितले आहे की सुरक्षितता लक्षात घेऊन,आधार ओटीपी आणि फेस व्हेरिफिकेशन आता अनिवार्य करण्यात आले आहे. जेणेकरून कोणत्याही प्रकारच्या फसवणुकीला वाव राहणार नाही. आज ९०% पेक्षा जास्त पीएफ दावे ऑनलाइन केले जात आहेत आणि त्यापैकी बरेच फक्त ३ दिवसांत ऑटो-सेटलमेंटद्वारे निकाली काढले जातात.

पीएफ काढण्याची सोपी प्रक्रिया:

• ईपीएफओ वेबसाइट किंवा उमंग App वर जा.
• तुमच्या यूएएन आणि पासवर्डने लॉगिन करा.
• आधार, पॅन आणि बँक तपशील अपडेट आणि पडताळणी केली आहे का ते तपासा.
• ऑनलाइन सेवा टॅबवर जा आणि क्लेम (फॉर्म-३१, १९, १०सी) वर क्लिक करा.
• लग्न, आजारपण, घर खरेदी करणे इत्यादी पैसे काढण्याचे कारण निवडा आणि आवश्यक माहिती भरा.
• नंतर ओटीपी किंवा फेस व्हेरिफिकेशनसह फॉर्म सबमिट करा.

सर्व काही बरोबर असेल तर कोणतेही अतिरिक्त कागदपत्र न देता फक्त ३ दिवसांत पैसे तुमच्या बँक खात्यात येऊ शकतात. म्हणून आताच तुमचे ईपीएफओ खाते तपशील तपासा आणि अपडेट करा, जेणेकरून गरजेच्या वेळी तुम्हाला कोणत्याही अडचणीशिवाय त्वरित पैसे मिळू शकतील.