₹3,000 कोटींच्या कर्ज घोटाळ्याचा पर्दाफाश: अनिल अंबानींच्या रागा ग्रुप आणि येस बँकेशी संबंधित 35 ठिकाणी ईडीचे छापे
मुंबई/दिल्ली: ₹3,000 कोटींच्या कथित कर्ज घोटाळ्याप्रकरणी अंमलबजावणी संचालनालयाने (ED) आज, गुरुवारी मोठी कारवाई करत रिलायन्स अनिल अंबानी ग्रुप (R-ADAG) आणि येस बँकेशी संबंधित संस्थांवर एकाच वेळी धाडी टाकल्या आहेत. मनी लाँडरिंग प्रतिबंधक कायदा (PMLA) अंतर्गत सुरू असलेल्या या तपासात मुंबई आणि दिल्लीतील 35 पेक्षा अधिक ठिकाणी छापे टाकण्यात आले असून, 50 कंपन्या आणि सुमारे 25 व्यक्तींवर ईडीचे लक्ष केंद्रित झाले आहे.
ईडीच्या प्राथमिक चौकशीत धक्कादायक माहिती उघड
ईडीने दिलेल्या प्राथमिक माहितीनुसार, 2017 ते 2019 या कालावधीत येस बँकेने R-ADAG शी संबंधित कंपन्यांना जवळपास ₹3,000 कोटींचे बेकायदेशीर कर्ज वितरित केल्याचे आढळून आले आहे. याहून धक्कादायक बाब म्हणजे, हे कर्ज मंजूर होण्यापूर्वीच येस बँकेच्या प्रवर्तकांच्या खात्यात मोठ्या रकमा जमा झाल्याचे पुरावे ईडीला मिळाले आहेत. या व्यवहारांमध्ये बँकेच्या अंतर्गत क्रेडिट धोरणांचे स्पष्ट उल्लंघन झाले असून, निर्णय प्रक्रियेतील गंभीर त्रुटी यातून अधोरेखित झाल्या आहेत.
ईडीने सांगितले की, “सीबीआयने यापूर्वी या प्रकरणी एफआयआर दाखल केल्यानंतर ईडीने तपास सुरू केला. अन्य यंत्रणांनीही या संदर्भातील महत्त्वाची माहिती ईडीकडे सुपूर्द केली आहे. चौकशीत बँका, गुंतवणूकदार आणि इतर संस्थांची फसवणूक करून जनतेचा पैसा वळवण्याचा हा एक सुनियोजित कट असल्याचे स्पष्ट झाले आहे.”
लाचखोरीचा संशय; बँकेचे अधिकारीही तपासाच्या चौकटीत
ईडी सध्या येस बँकेच्या काही वरिष्ठ अधिकाऱ्यांनी रागा ग्रुपला कर्ज मंजुरीसाठी लाच स्वीकारल्याच्या आरोपांचीही सखोल चौकशी करत आहे. यामध्ये जुन्या तारखांच्या क्रेडिट अप्रूवल फाईल्स, अपूर्ण आर्थिक विश्लेषण आणि बँकेच्या धोरणाविरुद्ध झालेली गुंतवणूक यावर विशेष भर दिला जात आहे. या छाप्यातून आणखी कोणती माहिती समोर येते, हे पाहणे महत्त्वाचे ठरणार आहे.
