वाशिम जिल्ह्यातील पेडगावजवळ भीषण अपघात: दोन ठार, २१ जखमी
वाशिम : वाशिम जिल्ह्यातील पेडगाव गावाजवळ बुधवारी सकाळी पुणे-कारंजा मार्गावर एक भीषण अपघात घडला. नागपूरहून संभाजीनगरकडे जाणाऱ्या भरधाव ट्रकचा टायर फुटल्याने चालकाचे नियंत्रण सुटले आणि तो समोरून येणाऱ्या ‘सिंध कंपनी’च्या ट्रॅव्हल्सला (क्रमांक MH 37W 7772) धडकला. या अपघातात ट्रॅव्हल्समधील एका प्रवाशाचा आणि चालकाचा जागीच मृत्यू झाला असून, २१ प्रवासी जखमी झाले आहेत.
मृतांची ओळख पटली
अपघातात जागीच मृत्यू झालेल्या प्रवाशाचे नाव मुकेश विठ्ठल नाटे (वय ३६, रा. अकोट, जि. अकोला) असे आहे. तर, ट्रॅव्हल्स चालक अशोक वानखडे (वय ५५, रा. अकोट) यांचा उपचारादरम्यान मृत्यू झाला.
अपघाताची भीषणता
ट्रकचा (क्रमांक CG 04 MH 0391) टायर फुटल्याने तो ट्रॅव्हल्सवर जाऊन आदळला. हा अपघात इतका भीषण होता की, ट्रॅव्हल्सच्या केबिनचा अक्षरशः चक्काचूर झाला, तर ट्रक जागेवरच पलटी झाला. ट्रॅव्हल्सचा चालक अशोक वानखडे केबिनमध्ये अडकल्याने त्यांचा जागीच मृत्यू झाला.
