फडणवीस हुशार-प्रामाणिक, ठाकरेंकडून स्तुतिसुमनं; पवार म्हणतात देवेंद्रंना पाहून माझा कार्यकाळ आठवतो
मुंबई : मुख्यमंत्री देवेंद्र फडणवीस यांच्या वाढदिवसाच्या निमित्ताने ‘महाराष्ट्र नायक’ या कॉफी टेबल पुस्तकाचे प्रकाशन करण्यात आले. यामध्ये माजी मुख्यमंत्री आणि शिवसेना (उद्धव बाळासाहेब ठाकरे) पक्षाचे प्रमुख उद्धव ठाकरे , राष्ट्रवादी काँग्रेस : शरदचंद्र पवार पक्षाचे प्रमुख शरद पवार यांनी फडणवीसांवर स्तुतिसुमनं उधळल्याचं पाहायला मिळत आहे. काही दिवसांपूर्वी पावसाळी अधिवेशनात फडणवीसांनी ठाकरेंना दिलेली ऑफर असो, किंवा आदित्य-फडणवीस यांची झालेली भेटगाठ असो, यामुळे राजकीय वर्तुळात कुजबूज वाढली आहे.
फडणवीसांंचं कार्य आणि कष्ट पाहून देवेंद्र फडणवीस थकत कसे नाहीत, असा प्रश्न पडत असल्याचं शरद पवार यांनी म्हटलं आहे. तर देवेंद्र यांना भविष्यात केंद्रात मोठी जबाबदारी मिळू शकते, अशा शब्दात उद्धव ठाकरे यांनी फडणवीसांसाठी सदिच्छा व्यक्त केल्या आहेत.
गिरीश महाजन यांच्या संकल्पनेतून साकारलेल्या ‘महाराष्ट्र नायक’ या कॉफी टेबल पुस्तकात ठाकरे-पवारांनी गौरवोद्गार काढल्यामुळे राजकीय वर्तुळाच्या भुवया उंचावल्या आहेत. फडणवीसांच्या वाढदिवसाच्या निमित्ताने राज्यपालांच्या हस्ते पुस्तकाचं विमोचन करण्यात आलं. याशिवाय अजित पवार, एकनाथ शिंदे, रवींद्र चव्हाण, गिरीश महाजन, नितीन गडकरी यांचेही लेख पुस्तकात आहेत.
शरद पवार काय म्हणतात?
देवेंद्र फडणवीस यांच्या कार्याची गती अफाट आहे. ते आधुनिकतेची कास धरणारे नेते आहेत. देवेंद्र यांनी आपल्या वरिष्ठांचा विश्वास सार्थ ठरवला आहे. त्यांच्या कामाचा उरक आणि झपाटा पाहून मला मी पहिल्यांदा मुख्यमंत्री झालो, तो कार्यकाळ आठवतो. त्यांचे कार्य आणि कष्ट पाहून देवेंद्र फडणवीस थकत कसे नाहीत, असा प्रश्न पडत असल्याचे ज्येष्ठ नेते शरद पवार यांनी म्हटले आहे. फडणवीसांच्या कामाची गती ते माझ्या वयाचे होईपर्यंत टिकून राहो आणि कालचक्र क्रमाने वृद्धिंगत होवो, असं अभिष्टचिंतन वाढदिवसाच्या निमित्ताने शरद पवारांनी व्यक्त केले आहे.
उद्धव ठाकरे काय म्हणाले?
देवेंद्र फडणवीस हे हुशार आणि प्रामाणिक राजकारणी आहेत. त्यामुळे देवेंद्र यांना भविष्यात केंद्रात मोठी जबाबदारी मिळू शकते, अशा शब्दात उद्धव ठाकरे यांनी फडणवीसांचं कौतुक केलं आहे.
