मुंबई : उपमुख्यमंत्री एकनाथ शिंदे दिल्लीत गृहमंत्री अमित शाह यांच्या भेटीसाठी पोहोचले होते. यावरुन शिवसेना नेते आणि खासदार संजय राऊत यांनी पत्रकार परिषदेत त्यांच्यावर टीका केली. अमित शाह, नरेंद्र मोदी हे त्यांचे नेते सध्या दिल्लीत आहेत. यांनीच शिंदेंचा गट निर्माण केला आहे. त्यांचे आदेश शिंदेंना पाळावे लागतात. शिंदे गुरुपौर्णिमेनिमित्त १०० टक्के दिल्लीत जाणारच होते, त्यांचा कार्यक्रम ठरलेलाच होता, असं संजय राऊत म्हणाले.
‘अमित शाहांची गुरू म्हणून पूजा केली…’
‘शिंदेंनी जाताना गुरुपौर्णिमेचं सगळं पाय धुण्याचं, पूजा-अर्जा, फूल असं साहित्य त्यांच्या विमानातून नेलं होतं. त्यांनी अमित शाहांची गुरू म्हणून पूजा-अर्चा केली, फोटो काढता आले नसले तरी माझ्याकडे पक्की माहिती आहे’, अशी उपरोधिक टीका संजय राऊत यांनी उपमुख्यमंत्री एकनाथ शिंदे यांच्यावर केली.
‘एकनाथ शिंदे दिल्लीत अमित शाहांसह इतरही नेत्यांना भेटले. त्यानंतर शिंदेंनी देवेंद्र फडणवीसांची नेहमीप्रमाणे तक्रार केली, फडणवीस आमची कोंडी करतात, ते आम्हाला काम करू देत नाही, अडचणीत आणत आहेत, अशा प्रकारच्या तक्रारींचा शिंदेंचा सूर होता,’ असं म्हणत राऊतांनी शिंदेवर निशाणा साधला.
शिंदे – शाहांमध्ये काय चर्चा? संजय राऊतांनी सांगितलं…
त्यानंतर त्यांनी स्वत: एक ऑफर ठेवली की, महाराष्ट्रात मराठी माणसांची एकजूट झाली आहे. ती अधिक भक्कम होईल आणि त्याचा आम्हाला त्रास होईल, त्यात लक्ष घालावं, ही एकजूट तुटली नाही, तर राजकीयदृष्ट्या आपल्याला मोठं नुकसान होईल, अशी चर्चा दोघांनी केली. त्यावर अमित शाहांनी शिंदेंना यावर तुमच्या मनात काय आहे असं विचारलं, शिंदेंनी मला मुख्यमंत्री करणं हा त्यावर उपाय आहे असं सांगितलं. मी मुख्यमंत्री झालो तर, मी या सगळ्या गोष्टी थांबवेन. पण यावर शाहांनी आता मुख्यमंत्री भाजपचा होईल असं उत्तर दिलं. त्यावर शिंदेंनी मी भाजपमध्ये विलीन होण्यास तयार आहे, पण मला मुख्यमंत्री करा, अशी भूमिका त्यांची असल्याचा उपरोधिक टोला राऊतांनी एकनाथ शिंदेंना लगावला.
मी जे बोलतोय ते शंभर टक्के सत्य…
स्वत:ला शिवसेना म्हणून घेणाऱ्यांनी, स्वत:ला बाळासाहेब ठाकरे यांचे अस्सल वारसदार म्हणून घेणाऱ्यांनी अशी विधानं करणं, दिल्लीतील राज्यकर्त्यांसमोर झुकणं हे महाराष्ट्रासाठी लज्जास्पद आहे, मी जे बोलतोय ते शंभर टक्के सत्य आहे, जर हे सत्य नसेल तर शिंदेंनी माझ्यासमोर प्रतिवाद करावा, असं आव्हान संजय राऊत यांनी एकनाथ शिंदेंना दिलं आहे.
