अमरावती : अमरावतीतील पी.डी.एम.सी. प्रभागातील वेलकम ज्येष्ठ नागरिक मंडळाच्या वतीने, दरवर्षीप्रमाणे याही वर्षी आषाढी एकादशी उत्साहात साजरी करण्यात आली. या भक्तिमय कार्यक्रमात विठ्ठल व रुक्मिणी मातेचा अभिषेक, पूजा, अर्चा, आरती, तसेच दिंडी व रिंगण सोहळा पार पडला.
या धार्मिक सोहळ्याला ३५ ते ९० वयोगटातील सर्व ज्येष्ठ नागरिक मोठ्या संख्येने उपस्थित होते. अनेकजण नियमित योगासन करणारे असल्याने कार्यक्रमात अध्यात्मासोबत आरोग्यप्रेमही दिसून आले.
वाढदिवसाच्या शुभेच्छा आणि शैक्षणिक गौरव
कार्यक्रमादरम्यान इंगोले यांना त्यांच्या वाढदिवसानिमित्त शुभेच्छा देण्यात आल्या. तर सराफ काकांच्या नातवाने – अवनीश सराफ याने NEET परीक्षेमध्ये उल्लेखनीय यश मिळवले. त्याबद्दल त्याचा पुष्पगुच्छ देऊन जाहीर सत्कार करण्यात आला. उपस्थितांनी टाळ्यांच्या गजरात अवनीशचे अभिनंदन केले.
मान्यवरांना विशेष पूजेसाठी सन्मान
विठ्ठल-रुक्मिणी अभिषेकाचा मान माजी नगरसेविका सौ. सुरेखा ताई लुंगारे व त्यांचे पती श्री. दिगंबर लुंगारे यांना मिळाला. श्री व सौ. सराफ यांना आरती करण्याचा बहुमान मिळाला. उपस्थितांनी या क्षणांचे छायाचित्रे व व्हिडीओ सोशल मीडियावर मोठ्या प्रमाणात शेअर केले.
फराळ व वेलकम ग्रुपचा ऋणानुबंध
कार्यक्रमानंतर वेलकम ग्रुपच्या वतीने सर्व वारकऱ्यांसाठी फराळाचे आयोजन करण्यात आले. वृद्धत्वाच्या वळणावर सुद्धा एकत्र येऊन आध्यात्मिक व सामाजिक आनंद साजरा करण्याचा आदर्श या मंडळाने प्रस्थापित केला.
