ASI अब्दुल कलाम यांची हत्या…. हत्येला अपघाताचे स्वरूप देण्याचा प्रयत्न
नवसारी : नवसारी येथे एक धक्कादायक घटना घडली असून वलगाव पोलीस ठाण्यात कार्यरत असलेल्या सहाय्यक पोलिस उपनिरीक्षक (एएसआय) अब्दुल कलाम यांची रात्रीच्या सुमारास निर्घृण हत्या करण्यात आली. ही घटना ड्युटीवरून घरी परतताना नवसारीतील टी-पॉइंट परिसरात घडली.
प्राथमिक माहितीनुसार, ५ ते ६ अज्ञात व्यक्तींनी अचानक एएसआय कलाम यांच्यावर प्राणघातक हल्ला केला. धारदार शस्त्रांनी वार करत त्यांना गंभीर जखमी करण्यात आले. स्थानिक नागरिकांनी त्यांना तातडीने रुग्णालयात दाखल केले, मात्र उपचारादरम्यान त्यांचा मृत्यू झाला.
हत्या झाल्यानंतर पोलिस खात्यात खळबळ आणि शोक
एएसआय कलाम यांच्या मृत्यूनंतर वलगाव पोलीस ठाण्यासह संपूर्ण पोलिस दलात शोककळा पसरली आहे. रस्त्यावर सेवेत असलेल्या एका कर्तव्यदक्ष पोलीस अधिकाऱ्याची अशा पद्धतीने हत्या होणे ही गंभीर बाब आहे. या घटनेमुळे पोलीस दलातील सुरक्षा व्यवस्थेवर प्रश्नचिन्ह निर्माण झाले आहे.
पोलिसांनी सुरू केली चौकशी; हल्लेखोर फरार
नवसारी पोलिसांनी अज्ञात हल्लेखोरांविरोधात खूनाचा गुन्हा दाखल केला असून तपास सुरू केला आहे. परिसरातील सीसीटीव्ही फुटेज तपासले जात असून स्थानिक गुन्हे अन्वेषण विभागाची (LCB) पथके देखील तपासात सहभागी झाली आहेत. पोलीस सूत्रांनी दिलेल्या माहितीनुसार, हल्लेखोर लवकरच गजाआड होतील असा विश्वास व्यक्त करण्यात येत आहे.
सत्ताधाऱ्यांना प्रश्न: सेवेत असलेल्या पोलीस कर्मचाऱ्याची रस्त्यावर हत्या, मग सुरक्षा कुठे?
जनतेच्या सुरक्षेसाठी अहोरात्र तैनात असलेल्या पोलीस अधिकाऱ्याच्याच सुरक्षिततेवर प्रश्न उपस्थित करणारी ही घटना प्रशासनाच्या कार्यक्षमतेवर बोट ठेवते. पोलिसांच्या सुरक्षा व्यवस्थेत मूलभूत सुधारणा करण्याची गरज आता अधोरेखित झाली आहे.
