अकोला : अकोल्यातील नामांकित सराफा व्यावसायिकांच्या दुकानांवर आज पहाटे आयकर विभागाने अचानक धाड टाकली असून, त्यामुळे संपूर्ण शहरात खळबळ उडाली आहे. नागपूर आणि मुंबई येथून आलेल्या आयकर अधिकाऱ्यांच्या पथकाने एकाचवेळी पाच ठिकाणी ही कारवाई केल्याची माहिती सूत्रांकडून मिळाली आहे.
मिळालेल्या माहितीनुसार, या सराफा व्यापाऱ्यांकडे मोठ्या प्रमाणात करचुकवेगिरी झाल्याची शक्यता व्यक्त करण्यात येत असून, प्राप्त माहितीनुसार याच अनुषंगाने ही कारवाई करण्यात आली. या छाप्यांची सुरुवात आज (मंगळवार) पहाटेच झाली असून, तपास यंत्रणा अजूनही संबंधित दुकानांमध्ये कागदपत्रांची तपासणी करत आहे.
ही कारवाई अत्यंत गोपनीयतेत राबविण्यात आली असून, सर्व दुकानांच्या बाहेर पोलीस बंदोबस्त तैनात करण्यात आले आहेत. त्यामुळे नागरिक आणि ग्राहकांमध्येही एक प्रकारची उत्सुकता आणि संभ्रमाचे वातावरण निर्माण झाले आहे.
आयकर विभागाकडून या कारवाईबाबत अधिकृत माहिती अद्याप देण्यात आलेली नसली, तरी प्राथमिक माहितीनुसार, व्यापाऱ्यांकडून उत्पन्नापेक्षा अधिक व्यवहार आणि बेहिशोबी रोकड याबाबत महत्त्वाचे दस्तऐवज हाती लागल्याची शक्यता वर्तविली जात आहे.
दरम्यान, या धाडीमुळे अकोल्यातील सराफा बाजारपेठेत अस्वस्थता पसरली असून, इतर व्यापाऱ्यांमध्येही भीतीचे वातावरण निर्माण झाले आहे. अकोल्यासारख्या जिल्हा मुख्यालयी अशा प्रकारची कारवाई ही अपवादात्मक मानली जात असून, या प्रकारावर संपूर्ण राज्यभरातून लक्ष केंद्रीत झाले आहे.
