आधी विद्यार्थीनीला अत्याचाराची धमकी, नंतर १०० रुपयांची सुपारी दिली अन् अल्पवयीन मुलाकडून संपवण्याचा प्रयत्न; पुणे हादरलं

हल्ली आपण आपल्या आजूबाजूला अनेक धक्कादायक प्रकार घडताना पाहत आहोत. रागाच्या भरात माणूस प्राणघातक पाऊल उचलत असल्याचेही अनेक घटनांतून समोर येत आहे. या स्थितीमधून अल्पवयीन मुले देखील सुटू शकलेले नाहीत. अल्पवयीन मुलांची मानसिकता कोणत्याही थराला जाऊ शकते अशीच एक घटना दौंडमधून समोर आली आहे. क्षुल्लक गोष्टीवरून एका विद्यार्थ्याने विद्यार्थिनीला आधी बलात्काराची धमकी दिली. त्यानंतर तिला मारून टाकण्यासाठी दुसऱ्या मुलाला शंभर रुपयांची सुपारी दिल्याची घटना समोर आली आहे.

दौंड येथील एका इंग्रजी माध्यमाच्या शाळेत हा प्रकार घडला आहे. विद्यार्थिनीच्या सतर्कतेमुळे हा संपूर्ण प्रकार उघड झाला आहे. याप्रकरणी मुख्याध्यपकासह दोन शिक्षकांवर गुन्हा दाखल करण्यात आला आहे. मुख्याध्यपकांनी हा प्रकार दाबण्याचा प्रयत्न केल्याचा आरोप आहे. विद्यार्थिनीची बदनामी केल्याप्रकरणी हा गुन्हा दाखल करण्यात आला आहे.
  पोलिसांच्या माहितीनुसार, दौंड परिसरात असणाऱ्या एका इंग्रजी माध्यमाच्या शाळेत एका विद्यार्थ्याने आपल्या पालकांची खोटी स्वाक्षरी केली. या गोष्टीची माहिती एका विद्यार्थीनीने शिक्षकांना दिली. त्यामुळे खोट्या सहीची माहिती शिक्षकांना दिल्याचा राग विद्यार्थ्यांच्या मनात होता. त्यामुळे त्याने त्या विद्यार्थिनीवर आधी बलात्कार करावा आणि नंतर तिचा खून करावा यासाठी १०० रुपयांची सुपारी दुसऱ्या वर्गातील अल्पवयीन मुलाला दिली. हा सर्व प्रकार संबंधित विद्यार्थ्याने त्या विद्यार्थीनीला सांगितला. त्यानंत्तर तिने हा प्रकार घरच्यांना सांगितला, घरच्यांनी याबाबत शाळा प्रशासनाला जाब विचारण्याचा प्रयत्न केला. मात्र शाळेकडून योग्य ते उत्तर मिळाले नाही.
  मात्र याउलट शाळेच्या मुख्याध्यापक आणि दोन शिक्षकांनी शाळेची बदनामी होऊ नये म्हणून विद्यार्थिनीनेच मुलांची बदनामी करण्याच्या हेतूने सुपारी दिल्याचे सांगत तिला मानसिक त्रास दिला. त्यामुळे विद्यार्थिनीची बदनामी आणि शैक्षणिक नुकसान केल्याप्रकरणी मुख्याध्यापकासह दोन शिक्षकांवर गुन्हा दाखल करण्यात आला आहे.